NOVO CONVENIO COLECTIVO NO CONCELLO DE CAMBADOS

As negociacións entre os delegados dos empregados municipais e o alcalde, Luís Aragunde, chegaron a bo porto. Segundo Manuel Duarte, de Comisións Obreiras, tras seis anos de reunións de traballo e adiamentos, o convenio colectivo está redactado, recibiu o visto e prace do secretario municipal e asinarase nunha próxima reunión que terá lugar dentro duns 15 días. O traballador confía en que o documento sairá adiante e establézanse os dereitos e obrigacións de todo o persoal municipal, que supera o centenar. E é que será o primeiro convenio colectivo dos funcionarios pois fai unha década aprobouse un que posteriormente foi anulado pola Subdelegación do Goberno, polo que os traballadores guiábanse polas normas vixentes na comunidade autónoma. En cambio, o persoal laboral xa tiña un texto que tamén se reformou. Outro dos obxectivos dos sindicatos era modificar a Relación de Postos de Traballo (RPT) para a catalogación dos postos de traballo que, xa no seu momento, non obtivo o respaldo da totalidade do persoal. Xa anunciara Aragunde no último Pleno da Corporación municipal que contrataron á empresa Galivalia Consulstgo SL para que realice este labor.                                                                                       De feito, segundo o delegado cambadés, na seguinte reunión estará presente un representante da firma para avanzar no documento coa intención de que estea listo a finais de ano. Tamén se comprometeu o alcalde, segundo o sindicalista, a encamiñar a organización de tribunais para sacar por concurso oposición as prazas que actualmente se están cubrindo interinamente.               O obxectivo dos sindicatos é conseguir que estes postos -ao redor de 15- estean ocupados por persoal fixo. Segundo el, o Real Decreto do Goberno central que impide aos concellos contratar máis persoal non será obstáculo porque había unha oferta de emprego público aberta con anterioridade á entrada en vigor desa norma. O representante de CCOO destacou a unión existente entre as organizacións e confía en que tanto o rexedor, como o tenente de alcalde, Antonio Iglesias, cumpran a palabra dada no último encontro. Comisións Obreiras obtivo catro dos oito delegados sindicais; outros dous están en mans da Central Sindical Independente e de Funcionarios (CSIF) de e a Unión Xeral de Traballadores (UXT) e a Confederación Intersindical Galega (CIG), que lograron un cada un. As eleccións celebráronse en abril pasado cunha importante participación.