FESTA DO LABREGO ESTA FIN DE SEMANA

A parroquia de Vilariño, en Cambados, celebrará esta fun de semana unha nova edición da Festa do Labrego, co tradicional desfile de tractores e carros do país, e con diversos concursos e actuacións musicais. A festa terá lugar o día 28, pero xa se poderá gozar de diversas actividades lúdicas na xornada previa do día 27.

Na xornada previa á celebración da XXXVI Festa do Labrego, os máis pequenos poderán gozar entrada a tarde cos xogos populares e cun gran colchón gratuíto, e participar no tiro á chave. 
A nota musical da noite poñerana as orquestras Tango e Saudade. 

O domingo , comezan os actos ás 09.00 horas coa alborada a cargo de grupos folclóricos. Ás 10.00 horas dará comezo o Desfile de Carros do País, Tractores, Cabalos e Carricaos que sairán como é tradición engalanados de flores, desde o Mercadona ata o novo recinto dá festa de Covas de Lobos, acompañados polos grupos folclóricos. 
Unha vez no recinto, levará a cabo a presentación da festa, a misa e a repartición dos deliciosos chourizos, o pan de millo e o viño tinto, alimentos que poderán degustar os asistentes mentres se deleitarán coas actuacións folclóricas programadas. Tamén terá lugar a exposición e poxa de produtos agrarios. 

Pola tarde celebraranse os típicos concursos de tiro á corda, carreira de sacos, pau con cebo..., e entregaranse os premios para o tractor e o carro mellor engalanados. 
Chegada a noite, os presentes poderán gozar coa verbena amenizada por orquestra Trébol. 

Haberá carpa de comida e servizo de pulpería.