TINO CORDAL PÍDELLE CELERIDADE Á XUNTA PARA A APERTURA DO CENTRO DE DÍA

O Consorcio Galego de Servizos de Igualdade e Benestar leva case que 4 meses para adxudicar o contrato de equipamento e amoblamento do Centro de Día de Cambados.

Esta semana asinouse o convenio de xestión do Centro de Día de Cambados. O Concello agarda agora que o Consorcio Galego de Servizos de Igualdade e Benestar publique nas vindeiras semanas o prego coas bases para a súa adxudicación. Tendo en conta que este tipo de procedemento administrativo non resulta rápido, podendo durar varios meses, dende o Concello pídenlle á Xunta que axilice os trámites pertinentes o máximo posible.

Segundo o concelleiro de Servizos Sociais, Sanidade e Terceira Idade, Tino Cordal, “xa temos a experiencia do procedemento de adxudicación do contrato de equipamento e amoblamento, que vai desenvolvéndose dun xeito moi lento. A aprobación do prego de cláusulas foi asinado polo Xerente do Consorcio o 2 de xuño. A apertura dos sobres coa documentación xeral das empresas candidatas á adxudicación fíxose o 26 de xuño. A dos sobres coas ofertas técnicas o 2 de xullo, pero a valoración das mesmas non se realizou ata o 15 de setembro. E hoxe, 22 de setembro, está previsto que se abran os sobres coas ofertas económicas”.

“Isto supón que o procedemento de adxudicación do contrato para o equipamento e amoblamento vai rematar durando arredor de catro meses. Xa que logo, non cremos que tarden menos en adxudicar a xestión do Centro de Día. Co cal, pensamos que o  Consorcio Galego de Servizos de Igualdade e Benestar, dependente da Consellería de Política Social, non abrirá as instalacións situadas en San Tomé neste ano 2017. Parece máis probable que a apertura do Centro de Día non se realizará antes de marzo do 2018. Aínda que non temos notificación algunha por parte da Xunta ao respecto”, sinala Cordal.

“Dende o Concello cumprimos en todo momento o que nos pediu a Xunta. O Centro de Día non é noso senón deles. E queremos confiar na súa boa vontade para abrilo o antes posible pero a verdade é que xa están tardando incluso máis do que nos esperábamos”.

“Nós seguiremos facendo presión para que poñan o Centro de Día en funcionamento á maior brevidade posible. Somos conscientes do necesario que resulta para moitas familias cambadesas que teñen maiores con doenzas e enfermidades que precisan atención nun centro destas características, e que agora están sendo atendidos fóra de Cambados ou en establecementos privados. Por iso, non pararemos ata conseguilo. Xa queda menos. Esperemos que a Xunta cumpra e que apertura do Centro de Día sexa por fin unha realidade dentro duns poucos meses”.